واحد اتنين الجيش العربى فين
الجيش العربى فى مصر
ساكن فى مدينة نصر
بيصحى من النوم العصر
وبيفطر شاى ومينين
واحد اتنين الجيش العربى فين
الجيش العربى فى سوريا
حالق ع الموضة كابوريا
وعلى طريقة فكتوريا
خلى الترماى بدورين
واحد اتنين الجيش العربى فين
]الجيش العربى الليبى
زى الفن التكعيبى
كله بتنجان يا حبيى
والظاهر واخد عين
واحد اتنين الجيش العربى فين
الجيش العربى خليجى
ما فيه حيل لا يروح ولا ييجى
هذا صمت استراتيجى
ايش فيك يا غراب البين
واحد اتنين الجيش العربى فين
الجيش العربى فى تونس
اخضر مثل البقدونس
وعزيزة بتعشق يونس
تبقى الحروبات بعدين
واحد اتنين الجيش العربى فين
الجيش العربى سودانى
سامع خطوته بودانى
هو انا ههجم فردانى؟
يلا ارجع يابو حسين
بلاش كلام فارغ يا شيخ
واحد اتنين الجيش العربى
الجيش العربى اتهان
يوم انضربوا الافغان
وسكت فى البوسنة زمان
وقبل ياكل بالدين
واحد اتنين الجيش العربى فين