]فكره هو مش كده كده كلو مكتوب
فكره سيطرت على ( ادمغه ) كتير اوى
تلاقى شخص كان ملتزم ( الى حد ما ) و فجاه يبطل و تسالو يقولك
ما انا لو مكتوبلى انى اكمل كنت كملت
او قم صلى ,, انا لو مكتوبلى اصلى كنت صليت
وللاسف الشديد الكثير من الى فكرو فى الموضوع و مالاقوش اجابه مقنعه اعتبروها ثغره فى الاسلام ( لا حول و لا قوه الا بالله )
لدرجه انى لما حاولت اتناقش مع حد فى الموضع دا و لاقانى هاقنعه راح قايل بصوت عالى
بص اكبر علماء الدين ماعرفوش يجاوبو على السوال ده او يحلوه
و دا معناه معنى موسف ,, انو مايعرفش اى حد من اكبر علماء الدين خالص
لكن هو مقتنع ان السوال مالهوش اجابه
فرافض النقاش
وعلشان كده قلت اطرح ان السوال و نجاوبه كده و نشوف فعلا ليه اجابه ولا لا
دلوقتى الثابت فى ديننا ان كل شىء مكتوب ,, بمعنى ان كل تحركاتك و افعالك مكتوبه عند ربنا
دلوقتى بقى انت بتقولى مالوش لزمه انك تصلى او تعمل خير عادى ماهو ربنا الى كاتبلك ده و انت كده كده لازم تعملو ؟
اه
طيب سوال بسيط جدا
هو فعلا كان مكتوب ,, بس انت عارف انو مكتوب
ايوه عارف طبعا انه مكتوب
يعنى انت عارف ان انت مكتوبلك انك تشرب خمر او تروح كباريه مثلا
اممم لا
طيب مين الى بيشرب و مين الى بيروح ,, المكتوب ولا انته
لا انا ,, بس انا اصلا مكتوبلى كده
يا اخى ما المكتوب دا اه مكتوب بس انت الى بتعمله مش حد تانى
بس هو مكتوبلى
يعنى انت لو قمت دلوقتى صليت ركعتين مين هايمنعك ... المكتوب
اه لو مكتوبلى ما اصليش مش هاصلى
ايوه ايه الى ممكن يمنعك بقه ؟
الحاجه الوحيده الى هاتمنعك انك تموت
ولا ايه
لا ممكن الميه تقطع مثلا
ما انت ممكن تتيمم مثلا
و اى حاجه تانيه موقته هاتخلص هو الموت هو الى هايمنعك و مش هاتصليهم خالص
صح
بس لو مت هايتحسبولك ,, هو مش انما الاعمال بالنيات و لكل امرىء ما نوى ,,
يعنى لو مش مكتوبلك انك تصليهم ,, بس هما اتححسبولك و اخدت اجرهم
وصلت للنقطه الى عايز اوصلهالك ؟
لا
طيب ماشى تعالى بقه علشان هازنقك الزنقه الى مش هاتعرف تطلع منها
انت مالك بالمكتوب و الى مش مكتوب اصلا
انت هاتحاتسب ربنا على الى كتبو ؟
استغفر الله العظيم لا يا عم مش اقصد كده
لا اصلك عمال تقولى ربنا كاتبلى كذا يبقى انا مش هاصلى و هو الى كاتب بقه هو الى يتحمل مسئوليه الى كتبو
ما هو ده معنى كلامك ,, و لو على كده انا موافق
موافق على ايه
روح حاسب الله ,, اقتل نفسك دلوقتى و هايبقى ساعتها مكتوبلك انك تموت كافر و روحلو بقى قلو انت كتبتلى انى اموت كافر ماتحاسبنيش
..................
مش قلتلك هازقك , هو مين الى هايبقى قتل نفسه
انا
كنت عارف انو مكتوبلك ؟
لا
مين الى عمل
انا
يبقى مين الى يتحاسب
انا
برافو عليك
و مع ذلك انا هاقولك حاجه حلوه و هازنقك تانى برده
انت سالت نفسك السوال ده ,, صح ؟
ايوه
طيب تفكيرك ماوصلكش تسال نفسك ,, انت ليه سالت نفسك السوال ده ؟
مش فاهم
يعنى انت سالت نفسك و فكرت فى ان كده كده دا مكتوب تمام ؟
تمام
مافكرتش بقه انت ايه الى جاب فى مخك السوال ده ؟
مممممم ,, لا
انا اقولك ,, بسيطه جدا انت سالت نفسك علشان تبرر اى حاجه غلط انت بتعملها
ازاى
يعنى انت لو اتوضيت و صليت ركعتين لله دلوقتى ,, مش هاتقول لنفسك دا مكتوبلى
لكن لو عملت حاجه غلط هاتقول لنفسك دا مكتوبلى
مش كده
اممممم ,, تصدق اه
انت بتفكر فى كده علشان تبرر لنفسك الغلط و خلاص و تقول دا مكتوبلى
و عايز الحاجه الحلوه تاخد عليها ثواب ,, و الوحشه تبقى مكتوبالك
يعنى متخيل الخير انت الى عامله ,, و الشر ربنا الى كتبهولك
و لو انت بتفكر صح ,, كنت فكرت ان الحلو و الوحش مكتوبلك ,, يبقى لما تعمل صح ماتاخدش ثواب و لما تعمل
غلط ما تتعاقبش ,, مش كده برده
تمام
فاكر بقه بمعرفتك كده مين الى مابيتحاسبش سواء عمل صح او غلط
الحيوانات
لا و فى ناس تانيه
مين
المجانين
طيب مش المجانين دول بشر برده زيك و برده مكتوبلهم الحاجات الى هايعملوهخا ,, مش هايتحاسبو ليه ؟
علشان هما معندهمش عقل
بالظـــــــــــــــــــــبط
انت بتتحاسب علشان قراراتك بياخدها عقلك ,, هى مكتوبه و معلومه بالفعل
لكن انت الى بتعملها مش حد تانى و انت الى هاتتحاسب عليها
*****
منقول بالحرف
