العمل : لسه طالبه علي قدي مودك ايه؟ : عدد المساهمات : 1497 نقاط : 7538 تاريخ التسجيل : 02/05/2009 الموقع : https://tofi.ahlamontada.com
موضوع: برمج عقلك الخميس 26 نوفمبر 2009 - 20:09
صباح الياسمين علي كل الناس الحلوين النهادرة جايبة لكم حاجة جامدة اوي قرتها وعجبتني وان شاء الله تعجبكم اسمها برنامج عقلك وان شاء الله هنقلهلكم نصا عشان خاضر توفي واعضاء توفي وبس اسيبكو بقي مع البرنامج ــــــــــــــــــــــــــــــــــــــ
د.شريف عرفة
ممكن تستغربوا من العنوان الغريب ده... إيه برمج عقلك ده؟؟ ممكن واحد ييجي يسألني: هو كمبيوتر ولامؤاخذة؟؟ يعني بدل ويندوز 98 ننزل إكس بي عشان مخنا يمشي أحسن ولا إيه يعني؟ تصدقوني بقى إن هو ده يبقى الموضوع بالضبط؟؟
تعال أسالك سؤال....
لو عندك كمبيوترين من نفس النوع واحد شغال بالإكس بي, والتاني شغال بالدوس.. هتكون كفاءتهم وقدراتهم واحدة؟؟ طيب لو عايز تدخل موقع التقنية... ينفع تستخدم الكمبيوتر أبو (دوس)؟؟ لأ طبعا.. عارف ليه؟ لأنك علشان تنجح في دخول الموقع لازم يكون عندك البرنامج المناسب... صح؟
فيه علم ظهر حديثاً اسمه البرمجة اللغوية العصبية.. (نقول برمجة العقل أظرف).. العلم ده قائم على فكرة إنك ممكن تعمل أي حاجة لو عرفت تبرمج عقلك بالبرنامج المناسب.. تخيل؟؟
يعني لازم تحط البرنامج المناسب في مخك عشان تعرف تستخدمه بطريقة أكفأ.. وتوصل للهدف اللي إنت عايزه.
تعال أسألك كمان كام سؤال....
عمرك حسيت إن اللي قدامك مش فاهمك وإنك مش عارف توصل له وجهة نظرك أو اللي إنت حاسس بيه؟؟ حسيت قبل كده إنك تايه ومش عارف تخطط لبكره كويس؟؟ لاحظت إنك مش فاهم والديك وإنهم مش فاهمينك؟؟ عمرك حسيت إنك متضايق كده من غير سبب ومش عارف تعمل إيه؟؟ عايز تطور قدراتك الوظيفية ومش عارف ازاي؟؟
أهي برمجة العقل بقى هي العلم اللي متخصص في حل كل المشاكل دي..
لو إجاباتك لمعظم الأسئلة اللي فاتت هي (أيوه).. إذا الموضوع ده هيعجبك قوي....
ملاحظة :برمج عقلك سلسلة متكاملة واي سؤال ان شاءالله اجاوبكم عليه بس ماتستبقوا الاحداث............
العمل : لسه طالبه علي قدي مودك ايه؟ : عدد المساهمات : 1497 نقاط : 7538 تاريخ التسجيل : 02/05/2009 الموقع : https://tofi.ahlamontada.com
موضوع: رد: برمج عقلك الأربعاء 10 فبراير 2010 - 13:16
إيـــــه نظامك؟! سؤال: • عمرك حسيت إن اللي قدامك مش فاهمك كويس؟؟ • عمرك لاحظت إنك مش قادر تقنع اللي قدامك بوجهة نظرك؟؟ المشكلة دي بتواجهنا كلنا... ساعات بتلاحظ إنك بتكلم حد في موضوع وهو مش قادر يوصل للفكرة اللي إنت عايز تقولها.. صح؟
عارف ليه؟
طيب قبل ما نجاوب السؤال ده هنلعب مع بعض لعبة صغيرة!
هاسألك كام سؤال.. أوك؟؟
(أهم حاجة في الموضوع هنا إنك تجاوب الأسئلة دي عشان هتحتاجها بعدين.. ما ينفعش تكمل قراءة من غير ما تجاوب عشان تستفيد من الموضوع ده....) • فكر في أي صديق ييجي في بالك حالاً... اتكلم عنه في 3 أسطر على الأقل
• اوصف المكان اللي إنت قاعد فيه دلوقتي... في 3 أسطر على الأقل
تخيل نفسك بعد 10 سنين من دلوقت في موقف معين.. اوصف الموقف اللي إنت متخيله ده بالتفصيل الممل
*ارجوى كتابه ردك بالورقه و القلم علشان تكون الاستفاده اكبر*
خلصت اللعبة؟؟ يلا بقى نعرف إيه الحكاية... الأنظمة التمثيلية: مخ الإنسان يا عزيزي عبارة عن أرشيف بيخزن كل المعلومات اللي الواحد مننا بياخدها في حياته, ويسترجعها وقت الحاجة.
اكتشف العلماء إن الأرشيف ده كذا نوع... مش نوع واحد...
وطبقاً للنوع ده بيتقسم الناس لثلاث (أنظمة تمثيلية) رئيسية:
شخص بصري
شخص سمعي
شخص حسي (شعوري)
يعني إيه الكلام ده؟؟ بص وطل معايا على المعلومات دى:
النوع طريقة عمل المخ سمات شخصية 1 البصري بيخزن المعلومات على شكل صور وأشكال.. ذكرياته وتفكيره عبارة عن صور.
بيتذوق الفن التشكيلي - أنيق - سريع الحركة والكلام واتخاذ القرار. 2 سمعي بيخزن المعلومات كأصوات - بيفتكر الأصوات والكلام اللي اتقال في موقف ما أكثر من أي حاجة تانية.
يتذوق الموسيقى - يميل إلى العقلانية وتحليل الأمور - غير متسرع. 3 حسي(شعوري) بيخزن المعلومات كمشاعر وأحاسيس - ممكن مايفتكرش من موقف ما غير الأحاسيس والمشاعر اللي كانت عنده وقتها منخفض الصوت - بطيء الكلام - تتخلله فترات صمت - قراراته تتحدد طبقاً لمشاعره - لا يهتم بالمظهر..
راجع إجاباتك اللي فاتت (مش قلت لك مهمة؟) عشان تعرف نظامك التمثيلي:
اتكلم عن صديق جه على بالك:
لو كنت بصري: هتوصف شكله ومظهره.. طويل - قصير - ملامحه... لو كنت سمعي: هتوصف طريقة كلامه وصوته عالي ولا منخفض وتقيمه تقيم عقلي (تفكيره كويس - لاسع....) لو كنت شعوري: هتوصف أحاسيسك وشعورك ناحيته.. (مريح- بكره- بحب..)
اوصف المكان اللي إنت قاعد فيه:
لو كنت بصري: هتوصف الديكور والألوان والأشياء اللي حواليك لو كنت سمعي: هتوصف الأصوات (ضوضاء - هادئ....) لو كنت شعوري: هتوصف أحاسيسك ومشاعرك (مكان مريح - الكرسي ناشف..)
- تخيل نفسك بعد 10 سنين..
لو كنت بصري: هتوصف شكل المكان أو الناس اللي حواليك. لو كنت سمعي: هتوصف الأصوات والكلام اللي بيتقال. لو كنت شعوري: هتوصف مشاعرك في هذه اللحظة..
عرفت بقى نظامك التمثيلي؟؟ أحياناً الإنسان له أكثر من نظام... يعني (سمعي- بصري) أو (شعوري- سمعي) كده يعني.. وممكن تتغير الأنظمة من وقت للتاني ومن سن للتاني...
اسألهم أسئلة من عينة (احكي لي الموقف الفلاني...) ولاحظ هيوصف أشكال ولا أصوات ولا أحاسيس... جرب وابعت.. وياريت تقول لنا عملت إيه....
العمل : لسه طالبه علي قدي مودك ايه؟ : عدد المساهمات : 1497 نقاط : 7538 تاريخ التسجيل : 02/05/2009 الموقع : https://tofi.ahlamontada.com
موضوع: رد: برمج عقلك الإثنين 8 مارس 2010 - 3:43
علي فكرة يا جماعة التوبيك دا عبارة عن سلسلة من المعلومات والمفروض اني انقلهلكم بس بصراحة انا ملاحظة انو مش في اقبال علي التوبيك كتير مع انو -من وجهة نظري المتواضعة - انا شايفة انو التوبيك دا حلو ومفيد انا نفسي نقلته مخصوص عشان انا لما قراته استفد جدا منه وحبيت افيدك معايا فياريت بس اشوف اي تفاعل مع التوبيك عشان اعرف اكمله ميرسي كتير يا احلي اعضاء عروســـــ البحـرــــــــة
bedo عضو ذهبي
الجنس : ذكر
العمر : 33
الابراج :
العمل : chemist مودك ايه؟ : عدد المساهمات : 2667 نقاط : 8599 تاريخ التسجيل : 22/06/2009
موضوع: رد: برمج عقلك الإثنين 8 مارس 2010 - 8:30
على فكره بقى يا عروسه
انا احيانا بندهش على موضوعات هنا كتير لدرجه انى مش بعرف ارد احيانا
لكن والله من انبهارى ببعض المواضيع مبلقيش كلام اقوله
انا قرات التوبيك ده كويس ....واتمنى تكمليه ونا متابع مع حضرتك ان شاء الله
العمل : لسه طالبه علي قدي مودك ايه؟ : عدد المساهمات : 1497 نقاط : 7538 تاريخ التسجيل : 02/05/2009 الموقع : https://tofi.ahlamontada.com
موضوع: رد: برمج عقلك الإثنين 8 مارس 2010 - 15:47
أهلا بيكم في حلقة جديدة من برمجة الدماغ...
إيه النظام؟
دلوقتي وبعد ما عرفنا نظامنا التمثيلي ونظام الناس اللي بنتعامل معاهم (راجع حلقة 1) هنستفيد من الكلام ده كله بإيه؟؟
هاقول لك مثال:
لو بتتنافس مع واحد تعرفه حول موضوع معين...
لو شخص بصري: هتلاقيه يستخدم كلمات(بصرية) زي: "شايف وجهة نظري؟.. بص للموضوع من الزاوية دي.. شكله كويس..."
لو شخص سمعي: هتلاقيه يستخدم كلمات (سمعية) زي: " اسمع.. ركز.. نشاز....." عارف ليه؟ لأنه (سامع) الفكرة في مخه, وبيحاول يقول لك التحليل المنطقي ليها...
لو شخص شعوري: هتلاقيه بيستخدم كلمات (شعورية) زي: "مش مستريح للموضوع ده...." عارف ليه؟ لأنه (حاسس) بالفكرة, وبيحاول ينقل لك مشاعره ناحيتها....
فهمت بقى الفولة؟؟
يبقى لو عايز تقنع واحد بصري بحاجة: حاول ترسم له الصورة بتاعتها وبتعبيرات بصرية.... لو سمعي: اقنعه بالمنطق وبتعبيرات سمعية... لو شعوري: اقنعه بالمشاعر والأحاسيس بتعبيرات حسية...
لعبة
تمرين عاوز تقنع واحد إنه يروح معاك السينما... هتقول له إيه؟... لو بصري؟
لو هو سمعي؟
لو هو شعوري؟
برافو عليك.... أيوه كده.... (راجع حلقة1)
قبل ما نختم الحلقة, تعالوا نتفرج على الأمثلة دي ونحاول نفكر فيها مع بعض: مثال:
فرغلي: "مراتي مش بتحبني... اشتريت لها غسالة فول أتوماتيك بدل الغسالة اللى صوتها عالي اللي عندنا وصرفت نص المرتب.... وبرضه مش مبسوطة....". التفسير: فرغلي (سمعي) يعتبر الغسالة هدية قيمة, بينما زوجته (شعورية) مش عايزة منه غير وردة أو كلمة حلوة في عيد جوازهم...
كمان مثال:
عنايات: "جوزي مش طايقني.. كل ما أكلمه يبص الناحية التانية.. سامع كل كلمة باقولها بس مش عايز يبص في وشي". التفسير: عنايات (بصرية) تعتبر النظر شيئا مهما للتعبير عن الحب.. وجوزها سمعي بيركز عن طريق ودانه... كمان مثال: تامر: "بصوا يا جدعان أنا مش طايق "ميدو" ده ممل قوي وعلى ما يقول كلمتين على بعض باكون نمت..." التفسير: تامر (بصري) بيتكلم بسرعة, وميدو (شعوري) بيتكلم ببطء (راجع حلقة1)
كفاية كده أمثلة؟؟ لا طبعاً.. ابعتوا لنا إنتم الأمثلة بتاعتكم.. والى اللقاء بالحلقة القادمة وإلى اللقاء
العمل : لسه طالبه علي قدي مودك ايه؟ : عدد المساهمات : 1497 نقاط : 7538 تاريخ التسجيل : 02/05/2009 الموقع : https://tofi.ahlamontada.com
موضوع: رد: برمج عقلك الإثنين 8 مارس 2010 - 18:07
اولا ميرسي يا بيدو علي مرورك بجد انا فرحانة انو التوبيك عجبك المهم بص هو انا مش دكتورة نفسية ولا انا اللي حاطة الكلامخ دا بس انا مجرد اني قراته وعجبني واستفدت منه زيك بالضبط ونقلته نصا عشان كدا انا مش اقدر افتيك في الحكاية دي بس انا ممكن اقولك وجهة نظري في الحكاية بس يعني هي مجدر راي مش كلام علمي مدروس بص بقي هو انا من خلال فهمي للكلام دا والكلام اللي هيجي في الحلقات اللي جاية اقدر اقولك انو مش في انسان شعوري بس او سمعي بس او بصري بس لا يعني هو الناس بتبقي حسية بصرية مثلا او حسية سمعية او ما شبه بس بيكون الشخص دا يغلب عليه الحسي مثلا ودا بصري سمعي وبيغلب عليه البصري مثلا وهكذا فاعتقد يعني انو الافضل انو يكون اي اتنين هيرطبتو ببعض ــ باي صورة صداقة او زواج او عمل او اي حاجة يعني ــ الافضل انهم يكونو يغلب عليهم نفس الصفة عشان يقدرو يفهمو بعض او يتوصلو مع بععض لكن ممكن يكون جواهم صفة تانية مختلفة يعني مثلا انسان حسي بصري (ويغلب عليه الحسب) وانسان تاني حسي سمعي (ويغلب عليه الحسي) بس طبعا دا مش شرط لنجاح عملية الاتصال بينهم انهم يعني يكونو شبه بعض طب لو انا مرتبط بحد ــ باي شكل ــ وهو مش شبهي ؟؟؟ بص بقي هو التوبيك اصلا اسمه برمج عقلك يعني تبرجج عقلك علي انو يعرف يتصل باي حد ايا كانت صفته يعني اتعلم اني انصل باي حد واتغير معا عشان يفهمني وهو دا الهدف من التوبيك وان شاء الله لما تتابع باقي الحلقات هتفهم قصدي اكتر وهتعرف ازي تبرمج علقلك علي الاتصال بالناس بكل الطرق انا اسفة اني طولت عليك كتير بس دي وجهة نظري ويارب تطلع صح ومرة تانية يا بيدو دا رايي انا مش كلام علمي تاخد بيه تقبل مروري عروســــ البــحــرــــــة
bedo عضو ذهبي
الجنس : ذكر
العمر : 33
الابراج :
العمل : chemist مودك ايه؟ : عدد المساهمات : 2667 نقاط : 8599 تاريخ التسجيل : 22/06/2009
موضوع: رد: برمج عقلك الإثنين 8 مارس 2010 - 21:01
ثانكس يا اسراء على ردك
فهمت انه رايك وكده مش كلام علمى
بس بجد رايك منطقى جدا من وجهه نظرى ف بعض الاشياء
ونا معاكى ف نقطه ان الحوار ده مش لازم ينجح اى علاقه بالضروره
و زى ما قلتى برضو اهم شئ الواحد يبرمج عقله بحيث يجيد التعامل مع الاخرين مهما كانت صفاته
انا حبيت اعرف رايك ونتناقش شويه
وبصراحه استفدت كتير من كلامك معايا
و مبصوت كتير بالمناقشه دى
و ف انتظار بقى باقى الحلقات عشان وجهه النظر تكتمل برضو عندى
بس ملحوظه اوعى دخولك هنا ياثر ع الدراسه او ما شابه والدروس وكده
عشان بس مبقاش السبب .....يعنى شوفى مصلحتك الاول ولو فضيتى نزلى بقيه الحلقات
ولو انى عارف ان دماغك كبيره هههههههههههه وطنشه يعنى
العمل : لسه طالبه علي قدي مودك ايه؟ : عدد المساهمات : 1497 نقاط : 7538 تاريخ التسجيل : 02/05/2009 الموقع : https://tofi.ahlamontada.com
موضوع: رد: برمج عقلك الجمعة 12 مارس 2010 - 14:31
المصافي!! هو: ماحدش بيحبني خالص..! هو: على فكرة "محمود" مش جدع..! هي: بقالي أسبوعين مابانامش!
شايف المشاكل دي؟ عارف إيه حلها؟ تعال نقرا الموضوع وهتحلها إنت بنفسك بكل بساطة..
دلوقتي وبعد ما عرفنا إيه هي (أنظمة الناس) في الحلقات اللي فاتت.. هنعرف النهارده حاجة مهمة قوي.. و هي:
المصفاة!!
عارف المصفاة؟؟ أيوه بالضبط.. اللي بتصفي بيها عصير الليمون.. زي اللي في الصورة دي:
هنعمل بيها إيه دي؟؟ وإيه علاقتها بالموضوع؟؟
تعالوا نشوف مع بعض إيه الحكاية: زي ما عرفنا, الواحد مننا بيجمع المعلومات من البيئة اللي حواليه عن طريق حواسه الخمسة وأنظمته التمثيلية (بصري، سمعي، شعوري،....) والمعلومات دي بتروح على المخ (الخريطة اللي بتحركنا).
بس السؤال هنا:
هل المعلومات دي بتروح مباشرة على المخ؟؟ الإجابة: للأسف لأ.. بتتصفى في مصفاة معينة قبل ما توصل!!.
والمصفاة دي هي موضوع حلقتنا النهارده..
المصفاة دي 3 أنواع: مصفاة الحذف مصفاة التعميم مصفاةالتحريف
1ـ مصفاة الحذف: المصفاة دي بتاخد المعلومات اللي جت لها وتحذف منها شوية.. بتعدي حاجات وماتعديش حاجات..
إنت قاعد دلوقتي أمام جهاز الكمبيوتر بتقرا الموضوع ده ومركز فيه.. وفي نفس الوقت فيه مؤثرات كتيييرة جدا حواليك.. فيه أصوات كتير حواليك صح؟ ركز كده.. لكن إنت ماكنتش منتبه للأصوات دي ومركز في القراءة.. صح؟
أهي المصفاة دي دورها كده.. بتلغي شوية مؤثرات وتسيب غيرها.. المعلومات اللي رايحة في طريقها للمخ المصفاة مش بتسيبها تعدي في حالها.. بتلغي شوية حاجات..
2ـ مصفاة التعميم: المصفاه دي بقى على العكس.. بتاخد شوية معلومات وتكبرها وتحسسك إن هي دي بس المعلومات الموجودة.. يعني عممت المعلومات دي على التجربة كلها.
فكر في حد إنت مش بتحبه خالص أو مش بتستلطفه مطلقا.. فكرت فيه؟.. اكتب هنا أهم صفاته:
شفت؟ هو ده بقى التعميم.. كل بني آدم فيه ملايين الصفات الكويسة والوحشة.. لكن إنت عشان مش بتحب الشخص ده, وصفته بصفة سلبية.. رغم إن فيه صفات إيجابية كتير..
مصفاة التعميم خلت الصفة السلبية دي هي اللي تتعمم.. رغم إن أكيد فيه صفات كويسة كتير، المصفاة دي ما خلتهاش تعدي لمخك (الخريطة).
هي: " كل الرجال قاسيين .." ده مثال تاني للتعميم.. صاحبة الجملة دي أكيد مرت بتجربة مع واحد قاسي, خلتها تعمم الموضوع على كل الرجال.. مع إن ده مش صحيح...
3ـ مصفاة التحريف: المصفاة دي غير اللي فاتوا خالص.. لأنها ببساطة بتحرف المعلومات اللي رايحة المخ ..
لي واحد صاحبي بيحب واحدة زميلتنا جدا, وهي مش في دماغها أصلا.. وفي يوم من الأيام كانت ماشية قدامنا وقالت: "صباح الخير!".. عادي يعني! صاحبنا ده قال إن ده دليل إنها بتحبه وإنها تعمدت تعدي قدامنا وتقول كده عشان تشوفه!! .. الغريب إنه كان مصدق كده تماما..
السبب في كده: مصفاة التحريف.. خلت الموقف العادي ده يتحرف ويبقى حاجة تانية خالص..
طيب.. أي نوع من دول عندنا؟؟ صح.. التلاتة طبعا.. كل مصفاة في وقتها بطريقة لا إرادية...
التحكم في المصافي: دلوقتي بعد ما فهمنا أنواع المصافي دي وازاي بتشتغل, نقدر بكل بساطة نتحكم فيها عشان نعيش حياة أسعد..
تعال نشوف المشاكل دي كده:
مشكلة هو: مراتي بتتكلم كتير قوي.. مش قادر أستحمل مشكلة هي: جوزي عمره ما يحط حاجة في مكانها خالص!!
خدت بالك من المشاكل دي؟؟
فكر كده في الفلاتر اللي استخدمت في كل حالة
المشكلة الزوج استخدم مصفاة ( التعميم والإلغاء)
ركز في مشكــلة الكلام الكتير لزوجته (تعميم) وتــجاهل حاجات كتــير قـــوي ممكن تكون كويسة فيها (إلغاء).
عارفين الحل إيه؟ يستخدم الإلغاء في موضوع الكلام الكتير ويعمم في أي صفة حلوة عندها.. يركز في إن مراته منظمة مثلا.. في إنها بتحبه.. في إنها بتربي عياله كويس وبتخلي بالها من بيته.. كده يعني.. كل ماتتكلم كتير قدامه يركز كم هي حنونة وجميلة وتحملت معي الكثير.. وبكده هيعدي الموضوع!
المشكلة الزوجة استخدمت مصفاة (التعميم والإلغاء والتحريف).
مصفاة التحريف: يعني معقول عمره ما حط حاجة في مكانها؟؟ ليه يعني؟؟ دايما بيحط الأكل في الدولاب والقمصان في التلاجة مثلا؟؟ عمره ما حط دماغه على المخدة يعني ولا بيحطها على الكومودينو دايما؟؟ أكيد منظم إلى حد ما في بعض الأشياء..
لو شغلت مصفاة (التعميم) في المواقف اللي كان فيها منظم.. هتلاقي إنه مش بشع إلى هذا الحد!! وبكده على الأقل هتقدّر حجم المشكلة بالضبط وتقدر تتفاهم معاه وتعلمه النظام في الحاجات القليلة اللي هو غير منظم فيها..
ودلوقتي وبعد ما حلينا المشكلتين دول.. ارجع للمشاكل اللي في أول الموضوع هتلاقي نفسك حليتها لوحدك..
جرب كده وابعت لنا الحلول
بتحكمك في المصافي بتاعتك هتقدر تحب (شريك حياتك- عملك- أهلك أكتر وأكتر) (بتعميم) صفاته الكويسة و(إلغاء) صفاته اللي مش عاجباك.. و(حرّف) زي ما إنت عايز.. بس وإنت بتستخدم المصافي دي اعرف إن الهدف الأساسي هو: إنك تعيش حياة أسعد, بعيدة عن الضغوط... ورحلة حياة سعيدة..
هو ده بقى موضوع المصافي (علميا اسمها: الفلاتر).
بعد ما المعلومات بتعدي من المصافي دي, بتروح على المخ.. اللي هو الخريطة..
إيه هي الخريطة دي؟؟
هو ده اللي هنتكلم عنه في الحلقة الجاية.. فإلى اللقاء
bedo عضو ذهبي
الجنس : ذكر
العمر : 33
الابراج :
العمل : chemist مودك ايه؟ : عدد المساهمات : 2667 نقاط : 8599 تاريخ التسجيل : 22/06/2009
موضوع: رد: برمج عقلك الجمعة 12 مارس 2010 - 18:02
جميل جدا يا ساره
اول مره اعرف موضوع المصافى ده او الفلاتر
اعتقد برضو ان التحكم ف المصافى ده شئ صعب شويه
لان الانسان بطبيعته عاطفى وبينحاز دايما ناحيه احساسه الوقتى
بس الموضوع مفيد جدا ...لازم الواحد يحاول يسيطر على نفسه
بس جميل اوى المشوار ... معلومات وبعدين تروح للمصافى وبعد كده المخ اللى هو الخريطه
العمل : لسه طالبه علي قدي مودك ايه؟ : عدد المساهمات : 1497 نقاط : 7538 تاريخ التسجيل : 02/05/2009 الموقع : https://tofi.ahlamontada.com
موضوع: رد: برمج عقلك الإثنين 22 مارس 2010 - 10:58
الخريطة!! النهاردة هنتكلم عن موضوع مهم قوي في حلقتين.. حلقة النهارده هي: خريطتنا، والحلقة الجاية: خريطة الناس التانية!!
مش فاهم حاجة؟ ولا يهمك.. تعال نخش في الموضوع...
هاحكي ليك قصة صغيرة: مرة واحد كان مسافر (شرم الشيخ) بالسيارة.. وعشان الطريق طويل أخد معاه خريطة... الراجل فضل ماشي ماشي ماشي.. وكل مرة بيضل طريقه ومش عارف يوصل..
الراجل وقف وطلع خريطة تانية واتأكد إنها خريطة (شرم الشيخ).. وفضل ماشي ماشي ماشي.. وبرضه تاه..
عارف طلع السبب إيه؟ طلعت خريطة قديمة, والطريق حصل فيه تغييرات وتجديدات كتير!!
الراجل وقف وأخرج خريطة جديدة اتأكد إنها خريطة (شرم الشيخ) وبتاريخ السنة دي.. وفضل ماشي ماشي ماشي.. تخيلوا حصل إيه؟؟ برضه تاه...
طلع السبب إيه؟؟ كان ماسك الخريطة بالمقلوب!!!
عايز أقول إيه؟؟ عايز أقول إن عشان ماتضلش طريقك, لازم تكون معاك الخريطة الصحيحة..
لكن.. إيه هي الخريطة دي؟؟
الخريطة دي عبارة عن مجموعة الخبرات اللي الواحد خدها في حياته كلها.. واللي بتخليه شايف العالم بطريقة مختلفة عن غيره..
هاسألك سؤالين هيوضحوا ليك الموضوع:
السؤال الأول: دبلة الخطوبة.. بتمثل لك إيه؟؟
السؤال الثاني: دكتور الأسنان.. بيمثل لك إيه؟؟
في حالة زي دي إجابتك محكومة بالخريطة اللي عندك.. اللي هي خبراتك وتجاربك..
في السؤال الأول: لو عايز تخطب حد أو مررت بخطوبة سعيدة, هتمثل لك: الفرحة والسعادة.. لكن لو كنت مررت بأزمة عاطفية مثلا, هتمثل لك: الألم والحزن.. يعني العكس تماما..
في السؤال الثاني: لو في طفولتك دكتور الأسنان كان لطيف, أو حد بتحبه دكتور أسنان, هيمثل لك: الطمأنينة والارتياح.. لو مريت بتجربة سيئة أو والديك كانوا بيهددوك بدكتور الأسنان, هيمثل لك: الألم والخوف...
نفهم من كده إن تجربتك الشخصية (خريطتك) حكمت نظرتك للعالم وللأشياء... وكل واحد أكيد عنده تجارب (خريطة) غير التاني... فالإجابة مش هتكون واحدة عندنا كلنا.... يبقى ببساطة: الخريطة بتاعتك مش شرط تكون صح. قاعدة مهمة
الخريطة ليست صحيحة دائما!!
يعني لا تثق إطلاقا في الخريطة اللي عندك.. واسأل نفسك دايما: هل هي خريطة صحيحة فعلا؟؟ هل تصلح للزمن ده؟؟ هل تأكدت إنك قمت بتحديثها؟؟ هل بتتوافق مع خرائط الناس التانية؟؟
الخرائط دي اتكونت عن طريق تجاربنا والمعلومات اللي حصلنا عليها طول سنين حياتنا... عن طريق:
الوالدين والأسرة المدرسة والجامعة المجتمع المحيط وسائل الإعلام
لكن للأسف لا يجب الثقة في هذه الخرائط لمجرد إنها الخرائط بتاعتنا ولمجرد إننا اتعودنا عليها.. مش كده؟
يعني لو الواحد كبر لقى أبوه وأمه بيدخنوا... غالبا هيكون مدخن... لو اتربى على عادات غذائية سيئة....... غالبا هيفضل يمارسها... لو اتضرب في المدرسة بقسوة.... ممكن يمارس نفس الأسلوب مع أولاده...
فدايما اسأل نفسك.. هل الخرائط دي صحيحة؟؟؟ هل عشان اتعودنا عليها والناس حوالينا برضه.. تبقى صح؟؟
مافيش حد بيعتبر نفسه غلط.. لكن الخريطة بتاعته هي اللي غلط وهو ماشي عليها..
القاتل.. خريطته: أنا ريحت العالم منه.. أنا عملت خير!! الحشاش.. خريطته: ده نبات طبي.. تاخد نفس يا كابتن؟؟ الحرامي.. خريطته: أنا باسرق عشان أحوش قرشين ينفعوني!!
وطبعا واضح إن كل الخرائط اللي فاتت غلط تماما ومش صحيحة خالص.. مش هتلاقي حد بيقول: "أنا عملت الجريمة عشان أنا شرير..".. هو ماشي بخريطته وفاكر إنها صح, لكن هي غلط زي ما شفنا..
عرفت بقى إن مهم قوي نراجع خرائطنا؟؟
راجع خريطتك أول بأول.. وقارنها بخرائط الناس اللي إنت شايف إنهم أحكم وأكبر منك.. قارنها بخريطة قدوتك..
راجعها من وقت للتاني عشان تتأكد إنك مش ماسك الخريطة بالمقلوب.... إتأكد دايما إنك ماسك الخريطة الصح بالتاريخ الصح وبالوضع الصح.. ورحلة حياة سعيدة.
وإلى اللقاء في الحلقة القادمة: خرائط الناس التانية!!!
bedo عضو ذهبي
الجنس : ذكر
العمر : 33
الابراج :
العمل : chemist مودك ايه؟ : عدد المساهمات : 2667 نقاط : 8599 تاريخ التسجيل : 22/06/2009
موضوع: رد: برمج عقلك الإثنين 22 مارس 2010 - 11:22
حمدالله ع السلامه يا سوسو
بتغيبى وترجعى بحلقه مميزه كالعاده
ع فكره حلقه الخريطه انهرده جميله اوى بجد
مشكله فعلا ان كل واحد فاهم ان الخريطه اللى ماشى عليها هى الصح
عشان كده لازم الواحد يكون عنده خبره بخرائط الاخرين و ازاى بيفكروا
عشان يقدر يوصل للخريطه الصح ف النهايه
واكيد ده هنعرفه ف الحلقه القادمه
ثانكيو سوسو
cindrella ஐسندريلا المنتديஐ
الجنس : انثى
العمر : 33
الابراج :
العمل : لثه طالبة مودك ايه؟ : عدد المساهمات : 4682 نقاط : 11683 تاريخ التسجيل : 02/05/2009 الموقع : https://tofi.ahlamontada.com/
موضوع: رد: برمج عقلك الثلاثاء 23 مارس 2010 - 16:59
طبعا يا سارة
زي مانتي عارفة
انا متابعة الموضوع بتاعك من اوله
واسفة لو مكونتش برد
بس انتي عارفة اكيد رايي فيه
بجد يا قمر من اهم موضوعات القسم
وويستحق التثبيت يا قمر
ياريت تثبتيه عشان يكون مرجع وموش يضيع في زحمة الموضوعات
تسلم ايديكي وانا معاكي ومتابعة ان شاء الله كل جديد
العمل : لسه طالبه علي قدي مودك ايه؟ : عدد المساهمات : 1497 نقاط : 7538 تاريخ التسجيل : 02/05/2009 الموقع : https://tofi.ahlamontada.com
موضوع: رد: برمج عقلك الخميس 25 مارس 2010 - 15:44
خرائط الناس التانية
سؤال: عمرك اختلفت مع حد في موضوع معين، وحسيت إنك إنت اللي صح وإن هو غلط؟؟ شايف الناس مش مقتنعة بأفكارك وحاسس إن معظمهم مابيفهموش؟؟
طبعا الأمثلة كتير عندنا كلنا..
هاحكي ليك حكاية قديمة قوي..
مرة ثلاثة عميان دخلوا أوضه فيها فيل.. وطبعا عشان مش شايفين, قعدوا يحسسوا على الفيل.. واحد مسك الخرطوم, التاني مسك الديل والتالت قعد يحسس على رجله...
وجه واحد سألهم: إيه هو الفيل؟؟
الأول قال: الفيل ده يشبه الثعبان بالضبط.. الثاني قال: لأ.. الفيل عبارة عن مقشة.. الثالث قال: ده كلام فارغ.. الفيل عبارة عن أربع عواميد..
خلصت القصة..!!
قبل ما تسخر من العميان دول وتستخف بسذاجتهم.. اسمح لي أسألك سؤالين:
إيه رأيك في مطربك المفضل؟؟ اكتب الإجابة بالتفصيل:
طيب.. تخيل لو سألنا جدتك عن رأيها في نفس المطرب.. هتكون الإجابة إيه؟ بالتفصيل:
هنا غالبا هيحصل خلاف في وجهات النظر.. إنت معجب بمطربك وجدتك رأيها غير كده خالص..
يا ترى ليه الخلاف ده حصل؟؟ ومين فينا اللي صح؟؟
بعد ما عرفنا في الحلقة اللي فاتت إن (الخريطة ليست صحيحة دائما!) وإن كل واحد مننا له خريطة مختلفة عن التاني تماما.. ممكن إنت نفسك تفسر الخلاف اللي حصل بينك وبين جدتك في موضوع مطربك المفضل..
كل واحد عنده خريطة غير التاني!
الخريطة بتاعتك: المطرب ده أنا باحبه من أول ما ابتديت أسمع مزيكا أساسا.. وهو مطرب ناجح وجميل!!
الخريطة بتاعة جدتك: في شبابي كنت باحب مطرب من أول ما ابتديت أسمع مزيكا أساسا.. وكان ناجح وجميل.. لكن بتوع اليومين دول مش زيه خالص!!!
أقول لك حاجه؟ لما تكبر في السن هتفضل تحب المطرب ده لأنه بيفكرك بأيام الشباب.. ولو حفيدك سمّعك مطربه المفضل, عارف رأيك فيه هيكون إيه؟ هيكون:زي رأي جدتك في مطربك المفضل
نتعلم من كده إيه؟ نتعلم من كده قاعدة مهمة جدا, وهي: قاعدة مهمة
يجب احترام خرائط الناس التانية..
لا تفترض إن خريطتك هي اللي صح وإن خرائط الناس التانية هي اللي غلط.. ماتعملش زي العميان اللي في أول المقالة.. احترم خرائط الناس التانية وحاول تعرفها.. عشان تقدر تشوف الفيل كله على حقيقته..
عايزين المرة دي بقى نعمل التالي:
اتفرج على الرسمة دي.. ياترى الخرايط بتاعة كل واحد من دول إيه؟؟
ابعت لنا خلاف حصل لك مع أي حد.. وقول الخريطة بتاعته والخريطة بتاعتك في الموقف ده..
الخريطة هنا ممكن تكون حاجه زي: تعليمه كده - اتربى على كده - خلفيته كده - مر بتجربة خلّته كده....... إلخ حلو الكلام؟؟ إلى اللقاء في الحلقة القادمة..
bedo عضو ذهبي
الجنس : ذكر
العمر : 33
الابراج :
العمل : chemist مودك ايه؟ : عدد المساهمات : 2667 نقاط : 8599 تاريخ التسجيل : 22/06/2009
موضوع: رد: برمج عقلك الخميس 25 مارس 2010 - 18:36
لا تفترض إن خريطتك هي اللي صح وإن خرائط الناس التانية هي اللي غلط.. ماتعملش زي العميان اللي في أول المقالة.. احترم خرائط الناس التانية وحاول تعرفها.. عشان تقدر تشوف الفيل كله على حقيقته..
العمل : لسه طالبه علي قدي مودك ايه؟ : عدد المساهمات : 1497 نقاط : 7538 تاريخ التسجيل : 02/05/2009 الموقع : https://tofi.ahlamontada.com
موضوع: رد: برمج عقلك الإثنين 5 أبريل 2010 - 9:08
ميرسي اوي يا بيدو معلش اتاخرت عليكو في الحلقة اللي عليها الدور بس الظروف بقي معلش عموما ان شاء الله الحلقة اللي جاية هتعجبكو اوي هما علي فكرة مجموعة الحلقات هتكون متصلة ببعضها وبنفس العنوان عموما مش هطول عليكو واسيبكو بقي مع الحلقة الجديدة
